കോഴിക്കോട്: സംസ്ഥാനത്ത് ഏറ്റവും മികച്ച ലിറ്റില് കൈറ്റ്സ് യൂണിറ്റുകള്ക്കുള്ള 2023-24ലെ പുരസ്കാരങ്ങള് പ്രഖ്യാപിച്ചു.
കോഴിക്കോട് ജില്ലാതലത്തില് ഒന്നാം സ്ഥാനം കൂമ്പാറ ഫാത്തിമാബി എംഎച്ച്എസ്എസും രണ്ടാം സ്ഥാനം നൊച്ചാട് എച്ച്എസ്എസും മൂന്നാം സ്ഥാനം കാലിക്കറ്റ് ഗേള്സ് വിഎച്ച്എസ്എസും നേടി.
സംസ്ഥാനതലത്തില് ഒന്നും രണ്ടും മൂന്നും സ്ഥാനത്തിനര്ഹരായ സ്കൂളുകള്ക്ക് യഥാക്രമം 2,00,000, 1,50,000, 1,00,000 രൂപയും പ്രശസ്തി പത്രവും ജില്ലാ തലത്തില് ഒന്നും രണ്ടും മൂന്നും സ്ഥാനക്കാർക്ക് യഥാക്രമം 30,000, 25,000, 15,000 രൂപയും പ്രശസ്തി പത്രവുമാണ് അവാര്ഡായി നല്കുന്നത്. ജൂലൈ ആറിന് നിയമസഭ മന്ദിരത്തിനുള്ളിലെ ശങ്കരനാരായണന്തമ്പി ഹാളില് മുഖ്യമന്ത്രി പിണറായി വിജയന് അവാര്ഡുകള് വിതരണം ചെയ്യുമെന്ന് കൈറ്റ് സിഇഒ അന്വര് സാദത്ത് അറിയിച്ചു.
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സംസ്ഥാനത്തെ വിദ്യാലയങ്ങളില് നടപ്പാക്കിവരുന്ന ഹൈടെക് പദ്ധതിയുടെ ഭാഗമായി ജില്ലയില് 168 ലിറ്റില് കൈറ്റ്സ് യൂണിറ്റുകളാണ് പ്രവര്ത്തിക്കുന്നത്. പദ്ധതിയുടെ ഭാഗമായുള്ള പ്രവര്ത്തനങ്ങളില് വിദ്യാര്ത്ഥികളുടെ പങ്കാളിത്തം ഉറപ്പാക്കുക എന്ന ലക്ഷ്യത്തോടെയാണ് ലിറ്റില് കൈറ്റ്സ് യൂണിറ്റുകള് വിഭാവന ചെയ്തിട്ടുള്ളത്. യൂണിറ്റുകളുടെ ദൈനംദിന പ്രവര്ത്തനങ്ങള്, തനത് പ്രവര്ത്തനങ്ങളും സാമൂഹ്യ ഇടപെടലും, പ്രവര്ത്തനങ്ങളുടെ ഡോക്യുമെന്റേഷന്, സ്കൂള് വിക്കി അപ്ഡേഷന്, ക്യാമ്പുകളിലെ പങ്കാളിത്തം, ഡിജിറ്റല് മാഗസിന്, വിക്ടേഴ്സ് ചാനല് വ്യാപനം, ന്യൂസ് തയ്യാറാക്കല്, അംഗങ്ങളുടെ വ്യക്തിഗത പ്രകടനങ്ങള്, ഹൈടെക് ക്ലാസ്മുറികളുടെ പരിപാലനം, പൊതുവിദ്യാഭ്യാസ സംരക്ഷണ യജ്ഞത്തിന്റേതുള്പ്പെടെ സ്കൂളിലെ മറ്റ് പ്രവര്ത്തനങ്ങളില് യൂണിറ്റിന്റെ ഇടപെടല് എന്നീ മേഖലകളിലെ പ്രവര്ത്തനങ്ങള് വിലയിരുത്തിയാണ് അവാര്ഡ് നൽകുന്നത്.
ഹാര്ഡ് വെയര്, അനിമേഷന്, ഇലക്ട്രോണിക്സ്, മലയാളം കംപ്യൂട്ടിങ്, സൈബര് സുരക്ഷ മേഖലകള്ക്കു പുറമെ മൊബൈല്ആപ്പ് നിര്മാണം, പ്രോഗ്രാമിങ്, റോബോട്ടിക്സ്, ഇ-കൊമേഴ്സ്, ഇ-ഗവേണന്സ്, വീഡിയോ ഡോക്യുമെന്റേഷന്, വെബ് ടിവി തുടങ്ങിയ നിരവധി മേഖലകള് അടങ്ങുന്ന ലിറ്റില് കൈറ്റ്സ് ക്ലബ്ബുകളുടെ പ്രവര്ത്തനം ഹയര്സെക്കണ്ടറി തലത്തിലേക്ക് കൂടി വ്യാപിപ്പിക്കുന്നതിലുള്ള പ്രവര്ത്തനങ്ങള് നടന്നു വരികയാണ്.