മന്ത്രി വീണാ ജോര്ജ് ജില്ലയിലെ ആശുപത്രികള് സന്ദര്ശിക്കും
നിപാ വിമുക്ത പ്രഖ്യാപനം ഇന്ന്
കോഴിക്കോട്: ‘ആര്ദ്രം ആരോഗ്യം’ പരിപാടിയുടെ ഭാഗമായി ആരോഗ്യ മന്ത്രി വീണാ ജോര്ജ് നവംബര് 8ന് ജില്ലയിലെ ആശുപത്രികള് സന്ദര്ശിക്കുന്നു. ഉച്ചയ്ക്ക് 2.30ന് വടകര ജില്ലാ ആശുപത്രി, വൈകുന്നേരം 3.30ന് കൊയിലാണ്ടി താലൂക്ക് ഹെഡ്ക്വാര്ട്ടേഴ്സ് ആശുപത്രി, 5.30ന് കോഴിക്കോട് ജനറല് ആശുപത്രി, 6.15ന് സ്ത്രീകളുടെയും കുട്ടികളുടെയും ആശുപത്രി എന്നിവ സന്ദര്ശിക്കും.
വൈകുന്നേരം 6.45ന് കലക്ടറേറ്റില് ജില്ലയുടെ അവലോകന യോഗം നടക്കും. വൈകുന്നേരം 4.30ന് കോഴിക്കോട് മെഡിക്കല് കോളേജില് നിപാ വിമുക്ത പ്രഖ്യാപനവും കേരള വണ് ഹെല്ത്ത് സെന്റര് ഫോര് നിപാ റിസര്ച്ചിന്റെ ഉദ്ഘാടനവും നടക്കും. എംഎല്എമാരുള്പ്പെടെയുള്ള ജനപ്രതിനിധികള്, ആരോഗ്യ വകുപ്പ് ഡയറക്ടര്, മറ്റ് ഉദ്യോഗസ്ഥര് എന്നിവര് മന്ത്രിയോടൊപ്പമുണ്ടാകും.
ഒക്ടോബര് 9 നാണ് ആര്ദ്രം ആരോഗ്യം പരിപാടി ആരംഭിച്ചത്. കോട്ടയം, ആലപ്പുഴ, എറണാകുളം, തൃശൂര്, ഇടുക്കി, വയനാട്, മലപ്പുറം ജില്ലകളിലെ എല്ലാ താലൂക്ക്, ജില്ലാ, ജനറല് ആശുപത്രികളും മന്ത്രി സന്ദര്ശിച്ചിരുന്നു. തിരുവനന്തപുരം, കോഴിക്കോട്, കണ്ണൂര് ജില്ലകളില് ഒന്നാംഘട്ട സന്ദര്ശനം നടത്തി. ഇതുവരെ 68 ആശുപത്രികളാണ് സന്ദര്ശിച്ചത്. ജീവനക്കാരുമായും രോഗികളുമായും പൊതുജനങ്ങളുമായും ജനപ്രതിനിധികളുമായും നേരിട്ട് ആശയവിനിമയം നടത്തി സത്വര നടപടികള് സ്വീകരിക്കാന് സന്ദര്ശനങ്ങളിലൂടെ സാധിച്ചു.
ആശുപത്രികളില് നടക്കുന്ന വികസന പ്രവര്ത്തനങ്ങള് നേരിട്ട് വിലയിരുത്താനും പോരായ്മകള് പരിഹരിച്ച് സമയബന്ധിതമായി നടപടി സ്വീകരിക്കാനുമാണ് സംസ്ഥാനത്തെ എല്ലാ താലൂക്ക്, ജില്ലാ, ജനറല് ആശുപത്രികളും മന്ത്രി നേരിട്ട് സന്ദര്ശിക്കുന്നത്. ആര്ദ്രം മിഷന് വിഭാവനം ചെയ്യുന്ന സ്പെഷ്യാലിറ്റി, സൂപ്പര് സ്പെഷ്യാലിറ്റി സേവനങ്ങള് ഉറപ്പാക്കുക, നിലവില് നല് കുന്ന സേവനങ്ങളും ജനങ്ങള്ക്ക് അത് അനുഭവവേദ്യമാകുന്നതും വിലയിരുത്തുക, നിര്മാണ പ്രവര്ത്തനങ്ങളുടെ പുരോഗതി അവലോകനം ചെയ്യുക, മാനദണ്ഡപ്രകാരമുള്ള സുരക്ഷാ ക്രമീകരണങ്ങള് വിലയിരുത്തുക, മാലിന്യ സംസ്കരണ സംവിധാനങ്ങളുടെ കാര്യക്ഷമത ഉറപ്പാക്കുക തുടങ്ങിവയാണ് സന്ദര്ശനത്തിന്റെ ഭാഗമായി അവലോകനം ചെയ്യുന്നത്.
