ബേപ്പൂർ തസരയിൽ കലാകാര സംഗമം വരുന്നു

50 വിദേശ രാജ്യങ്ങളിൽ നിന്നുള്ള കലാകാരന്മാരുടെ സംഗമം ഫെബ്രുവരി 1 മുതൽ

കോഴിക്കോട്: ഫെബ്രുവരി 1 മുതൽ മാർച്ച് 1 വരെ 50 വിദേശ രാജ്യങ്ങളിൽ നിന്നുമുള്ള നൂറോളം കലാകാരന്മാരുടെ (ചിത്രകാരന്മാർ, വസ്ത്ര കലാകാരന്മാർ,ശില്പികൾ,) സംഗമം ( സൂത്ര 2024) ബേപ്പൂരിലെ തസര വീവിംഗ് സെന്ററിൽ നടത്തും.

പങ്കെടുക്കുന്ന ഓരോ കലാകാരന്മാരും അവരുടെ മൂന്നു വീതം സർഗാത്മക രചനകൾ ഫെബ്രുവരിയിൽ ഇവിടെ പ്രദർശിപ്പിക്കും. ഒരു മാസത്തെ ശില്പശാലയിൽ അവർ നിർമ്മിക്കുന്ന എല്ലാ രചനകളും ഈ പ്രദർശനത്തോട് കൂട്ടിച്ചേർക്കും.

ഈയിടെ വിട്ടുപോയ പ്രശസ്ത കലാകാരി ശാന്തയുടെ ക്രിയാത്മക ജീവിതത്തോടുള്ള ആദരവും ആഘോഷവും ആണ് ഈ മഹോത്സവം.

ഞങ്ങളുടെ അതിഥി മന്ദിരത്തിലും അയൽക്കാരുടെ വീടുകളിലും ആണ് കലാകാരന്മാർക്കുള്ള താമസസൗകര്യം ഒരുക്കിയിരിക്കുന്നത്. 100 ഓളം പേർക്ക് ഭക്ഷണവും താമസവും സൗജന്യമായിരിക്കും.അടുത്തും അകലെയുമുള്ള ഒരുപാട് സ്നേഹിതരുടെ സഹായ സഹകരണത്തോടെയാണ് ഈ മേള സാധ്യമാകുന്നത്.

കൈവേലകളിൽ നിന്നും സർഗാത്മക രചനകളിൽ നിന്നും അകലം പാലിക്കുകയും ഡിജിറ്റൽ ലോകത്തേക്ക് ചേക്കേറുകയും ചെയ്യുന്ന വിദ്യാസമ്പന്നരായ നമ്മുടെ ചെറുപ്പക്കാരുടെ ശ്രദ്ധ ഒരല്പമെങ്കിലും ക്രിയാത്മക ലോകത്തേക്ക് ആകർഷിക്കാനുള്ള ഒരു ശ്രമം കൂടിയാണ് ഈ കലോത്സവം.

കൊച്ചി ബിനാലെ ട്രസ്റ്റി ടോണി ജോസഫ്, ആർക്കിടെക്ടുമാരായ ബാബു ചെറിയാൻ, പി പി വിവേക്, ഐഐഎ കാലിക്കറ്റ് പ്രസിഡന്റ് നൗഫൽ, ആർക്കിടെക്ട് ഷെറിൻ ഖദീജ, തസര മാനേജിങ് ട്രസ്റ്റി വാസുദേവൻ, ശന്തനു എസ് നായർ, നിവേദ എന്നിവർ വാർത്താസമ്മേളനത്തിൽ പങ്കെടുത്തു.