കോഴിക്കോട്: കേന്ദ്രസർക്കാറിന്റെ സ്കിൽ ഡവലപ്മെന്റ് പദ്ധതിയായ ഡിഡിയുജികെവൈ-യിൽ ഊരുളങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റി കേരളത്തിലെ മികച്ച തൊഴിൽദാതാവ്. യുഎൽസിസിഎസ് – ഡിഡിയുജികെവൈ സെന്ററിന് തിരുവനന്തപുരം കാര്യവട്ടം ട്രാവൻകൂർ ഇന്റർനാഷണൽ കൺവൻഷൻ സെന്ററിൽ നടന്ന ഡിഡിയുജികെവൈ പൂർവ വിദ്യാർത്ഥിസംഗമമായ ടാലന്റോ-24-ൽ തദ്ദേശസ്വയംഭരണമന്ത്രി എം ബി രാജേഷ് പുരസ്കാരം സമ്മാനിച്ചു. പ്രൊജക്ട് ഹെഡ് എ കെ സുരേഷ് ബാബു, ട്രെയിനർമാരായ സപ്ന വി പി, പ്രജിത്ത് പി എന്നിവർ ചേർന്ന് ഏറ്റുവാങ്ങി.
ഇതേ പ്രൊജക്റ്റിന് 2023-ൽ യുഎൽസിസിഎസ് – ഡിഡിയുജികെവൈ സെന്ററിലെ വിദ്യാർത്ഥിയായ സാന്റോ ജോസഫിന് ഹുണർ ബാസ് പുരസ്കാരവും ലഭിച്ചിരുന്നു. ദേശീയതലത്തിൽ 66-ഉം സംസ്ഥാനതലത്തിൽ 12-ഉം വിദ്യാർത്ഥികളിൽനിന്നാണ് സാന്റോ ജോസഫ് തെരഞ്ഞെടുക്കപ്പെട്ടത്. വടകര ഒഞ്ചിയം നാദാപുരം റോഡിലാണ് സെന്റർ.
കടകംപള്ളി സുരേന്ദ്രൻ എംഎൽഎ അധ്യക്ഷനായ ചടങ്ങിൽ മേയർ ആര്യ രാജേന്ദ്രൻ, ജാഫർ മാലിക് ഐഎഎസ്, കേന്ദ്ര ഗ്രാമവികസനമന്ത്രാലയം സ്കിൽ സെക്രട്ടറി കർമ്മ ബ്യൂട്ടിയ, സന്ധ്യ ഗോപകുമാരൻ തുടങ്ങിയവർ സംസാരിച്ചു.
