വികസനത്തിന് നൂതന പദ്ധതികള് തേടി ജില്ലാ വികസന സമിതി
പ്രവൃത്തികള് വേഗത്തിലാക്കാന് നിര്ദേശം
കോഴിക്കോട്: ജനങ്ങള്ക്ക് പരമാവധി പ്രയോജനം ലഭിക്കുന്ന വികസന പ്രവര്ത്തനങ്ങള്ക്കായി നൂതന ആശയങ്ങളും പുതിയ പദ്ധതി നിര്ദേശങ്ങളും സമര്പ്പിക്കാന് വകുപ്പുമേധാവികളോട് ജില്ലാ വികസന സമിതി യോഗം ആവശ്യപ്പെട്ടു. കലക്ടറേറ്റ് കോണ്ഫറന്സ് ഹാളില് ജില്ലാ കലക്ടര് എം.എസ്. മാധവിക്കുട്ടിയുടെ അധ്യക്ഷതയില് ചേര്ന്ന യോഗത്തിലാണ് നിര്ദേശം ഉയര്ന്നത്. വിവിധ വകുപ്പുകളുമായി സഹകരിച്ച് നടപ്പിലാക്കാവുന്ന പ്രായോഗിക പദ്ധതികള് വേഗത്തില് തയ്യാറാക്കി സമര്പ്പിക്കാന് ഉദ്യോഗസ്ഥരോട് കളക്ടര് നിര്ദേശിച്ചു.
2020-ല് ആരംഭിച്ച പെരിഞ്ചേരിക്കടവ് റഗുലേറ്റര് കം ബ്രിഡ്ജിന്റെ നിര്മാണം വൈകുന്നത് സമീപപ്രദേശങ്ങളില് ഉപ്പുവെള്ളം കയറാന് ഇടയാക്കുന്നുവെന്ന് പാറക്കല് അബ്ദുള്ള എം.എല്.എ ചൂണ്ടിക്കാട്ടി. ഉദ്യോഗസ്ഥരുടെ അനാസ്ഥയാണ് ഇതിന് കാരണമെന്നും വടകര മേഖലയിലെ കുടിവെള്ള വിതരണത്തെപോലും ഇത് ബാധിക്കുമെന്നും അദ്ദേഹം വ്യക്തമാക്കി. ഇതിനുപുറമെ ലോകനാര്ക്കാവ് മ്യൂസിയം നിര്മാണത്തിലെ മന്ദഗതി പരിഹരിക്കാനും കുറ്റ്യാടി ബൈപ്പാസ് പ്രവൃത്തികള് തടസ്സമില്ലാതെ വേഗത്തിലാക്കാനും യോഗത്തില് ആവശ്യമുയര്ന്നു.
വടകര ഭാഗത്തെ ദേശീയപാത നിര്മാണം യാത്രക്കാര്ക്ക് വെല്ലുവിളിയായി മാറിക്കൊണ്ടിരിക്കുകയാണെന്നും തകര്ന്ന സര്വീസ് റോഡുകള് പോലും അറ്റകുറ്റപ്പണി നടത്താത്തത് ജനങ്ങള്ക്ക് കടുത്ത ദുരിതമുണ്ടാക്കുന്നുവെന്നും കെ.കെ. രമ എം.എല്.എ പറഞ്ഞു. തലശ്ശേരി ഹെറിറ്റേജ് പ്രോജക്ടിന്റെ ഭാഗമായ താഴെ അങ്ങാടിയിലെ പ്രവൃത്തികള് പുനരാരംഭിച്ച് ഒക്ടോബര് പകുതിയോടെ പൂര്ത്തിയാക്കാനുള്ള നടപടികള് അടിയന്തരമായി സ്വീകരിക്കണമെന്നും എം.എല്.എ ആവശ്യപ്പെട്ടു.
പേരാമ്പ്ര മണ്ഡലത്തിലെ നൊച്ചാട്, ചക്കിട്ടപ്പാറ, ചെമ്പനോട, ചങ്ങരോത്ത് വില്ലേജുകളിലെ പട്ടയ വിതരണം അടിയന്തരമായി പൂര്ത്തിയാക്കണമെന്ന് ഫാത്തിമ തഹിലിയ എം.എല്.എ ആവശ്യപ്പെട്ടു. ഗതിമാറി ഒഴുകുന്ന കടന്തപ്പുഴയുടെ ഓരത്ത് താമസിക്കുന്ന കുടുംബങ്ങളുടെ സുരക്ഷ ഉറപ്പാക്കുന്നതിനുള്ള പ്രവൃത്തികളുടെ പുരോഗതിയും, പേരാമ്പ്ര താലൂക്ക് ആശുപത്രിക്ക് സി.കെ.ജി കോളേജ് ഭൂമി കൈമാറുന്ന നടപടികളും യോഗത്തില് വിശദമായി വിലയിരുത്തി.
വിവിധ സര്ക്കാര് വകുപ്പുകളുടെ പദ്ധതി വിനിയോഗവും നവകേരള സദസ്സുമായി ബന്ധപ്പെട്ട പദ്ധതി പ്രവൃത്തികളുടെ പുരോഗതിയും യോഗം അവലോകനം ചെയ്തു. എ.ഡി.എം കെ. ഷറീന, ജില്ലാ പ്ലാനിങ് ഓഫീസര് പി.ആര്. രത്നേഷ്, വിവിധ വകുപ്പ് മേധാവികള് തുടങ്ങിയവര് യോഗത്തില് പങ്കെടുത്തു.
